✍️فەرامەرز نادری
کتاو «ڕێزوان کوردی کوردەلی یا پاڵەیی – پاڵەوی» کار «نامدار جابری» وە مێەت ئەنستیتۆ زانست ئیلام فرەوەختە بڵاوەو کریاس.
ئێ کتاوە یەکم بەرهەمێگە کە لە بارەێ وەسف پێکهاتەیی شێوەزار ناسیاێ وە کوردەلی نۊسیاس. ئێ شێوەزارە لە شارەیل دێهلۆڕان، ئاودانان، پاڵە و میمە لە ناوچەێ باشوور پارێزگاێ ئیلام وە کار بریەێد و هاوشێوەییەیل فرەێگ وەگەرد کوردی کرمانجیا دێرێ.
نۊسەر بەرهەم «نامدار جابری» توێژەرە تواناێ خەڵک دێهلۆڕان و ئەندام سەرەکی ئەنستیتۆ زانست ئیلامە و کتاوەگەێ لە سایز وەزیری چاپ کریاس.
ئێ بەرهەمە لە وەشانگەێ زایەڵە لە مەریوان لە ٩٥ لاپەڕە ٥٠٠ جڵد و نرخ ٥٠ هزار تمەن چاپ کریاس.
ئێ کتاوە وە دو زوان فارسی – کوردیە و لە بابەتەیل ڕێزوانی لەواێ لێکدانەوەێ کردارەگان، جەخت لە سەر وشەگان، ناودێرەگان، جێناوەگان، پێشگرەگان، کردار نەزانراو و… پێک هاتێیە.
ڕێنۊس ئێ کتاوە وە پێ کوردی پێوەر و ئستانداردە.
نۊسەر لە ئاخرەو وە ئێ ئەنجامە ڕەسیە ک کوردی پاڵەیی ٨٠ لە سەد وەگەرد پەل سەرەکی زوان کوردی یا هە ئەو کورمانجیا هاوبەشە و لە ڕوانگەێ مێژووییشەو وە یە ئاماژە کەێدن ک هووز دێرین و بنەڕەتدار کوردەلی لە کوردستان سووریە (ڕۆژاوا) نیشتەجیین.
