چیرووک: دەنگ بێ‌گیان / نۊسەر: نەسرین باباخانی

📙چیرووک: دەنگ بێ‌گیان

✍️نۊسەر: نەسرین باباخانی

فایل چیرووک دەنگ بێ‌گیان PDF

من تەنیا سەرێگ بۊم. نیەزانم کی و کەی له لەشم جیاومەوکردن. هاتێ چەن ساڵ پێش بۊ. وه هۊرم نییه. ئەمان هەر له رووژ یەکمەو تەنیا سەرێگ نەویمە. ئێسە قژەیل سیەی من له مل بڕیام بەرز ترەو بۊنە. ناۊنەمه ناو مێدان گەورای شار ک وه گشت جیێگ‌ شلخ‌تر بۊ. وه ناو سەرما و گەرما وه ئێرە بۊم. ئەمان شكای نەۊم. نیەۊشم خوزەو لەشم بۊنیامەو بیاتامێ یەكێگ و لە ئێرە بچیاتام. ئاخر ژان لەشم فرە بۊ… ژان عادت مانگیانە، ژان كار بێ حقوق، ژان مناڵ هاوردن، ژانێ…وەلێ ئاخر فایدەی داشتین سەر وەگەرد گیان چەس؟

ئێسە لێره بۊم. تۊەنسیام بنووڕمه مەردمەو ک دانه قەیمەو رەد بیان. یەکێ وەگەرد تلیفون قسه کردیا، یەکێ گیانێ خورانییا، یەكێ خەنیا وە دەنگ بەرز، یەكێ لە وەر خوەیا قسە كردیا، یەكێ سیگار كیشیا و یەكێ چمای هەر وە ئی دنیا نەۊ… ئەمان نە کەس م دۊنیا و نە كەس دەنگم ژنەفتیا.

گاجار کەمووتەر و مەلۊچکەیل هاتیان نیشتیانە بان سەرم و ریقنه کردیانه قەییم و چیان. گەرمای وه بان دەم‌چەوم حس کردیام ئەمان دەس نێیاشتم بسڕمەوێ، وسیام تا وشکەو بوو و بکەفێده رۊ زەۊ. بازێ وەختەیلیش كەفتیامە ژێر دەس پا مەردم و نەیشتیام خاس ڕی بكەن، وە تک پا دیانە لیم. یەی جار ک خوەر درەوشیاو وە بان سەرم خڕ خواردیا، خاس نیەزانم من بیم یا خوەر ك خڕ خوەیم، شایەدیش هەم وە تک پا داۊنە لیم، نیەزانم، وەلی هەر لیوا ك وە بان زەۊ گل خواردیام و سەرم گیج خواردیا، مناڵێگ ک دەس باوگێ گردۊد چەوێ كەفتە لیم. دەس باوگێ وێل كرد، وە دەو هات و هێزم دا. یەکم جار بۊ كەسێگ دۊنیادەم. بردمه لا باوگێ و وەت: ”بنووڕە پێ، بزان چە دیمسەو؟ سەرێگە، قژیش دێرێ. وەگەرد خوەم بارمێ؟ بوەیمنێ ئڕا ماڵ؟ رەنگ چەوەیل و قژ مناڵەگە جوور شەو سیە بۊ. شێوەی مناڵ وە وەر چەوم ئاشناس، چمای ناسمەی. پیا كەڵێنێگە، كوتر شەڵوار ها لە وەرێ، هەر تماشامیش نیەكەی. خوڕێدە مل سەر مناڵەگە: ”فڕەی دە، وەگەرد تنم، فڕەی دە. كەسیفە، سەر بێ‌گیان یە ژن وە كار چە تیەی؟؟ وە دەرد چە خوەی، ئڕای چەمانە ”پیا وە دەس مناڵ رواكنێدەم و بێ ئیە ک تماشام بكەی فڕەم دەی، چمه كەشكەشی ئاسمان.

 وەختی وە ڕمە كەفمەو خوار خوەم دۊنم ک وە بان تەختەگەم دریژ كیشامە، دەنگ پرخەی شۊگەم تیەی. مناڵەگم لە ئەولا تر خەفتێیە. تماشا قژەیل سیەی كەم. دەس دەمە قەی گیانم و لە وەر خوەم ئۊشم: من تەنیا سەرێگ بۊم. کەی و کی له لەشم جیاومەو کردن، نیەزانم.