یەکانگیری
سرووشت پەرەستشگاێگە وە کووماج و سۊن زینێەو
ک گاجار قسیەیل وەمێگ لێان ڕەسێدە ئاێەمەیل.
لەێرە ئاێەم ڕەێ بوود وە ناو دارسانێ لە نیشانەیل
ک گشت پسا نووڕنە پێ، وە چەوەیل شناسێگەو.
چۊ دەنگدانەوەێ بەرز ک لە دۊر دۊر ئامێتە بوون،
لە یەکانگیری تیەریکێ، یەکانگیری قۊل قۊلێ،
وڵا چۊ پیەنای شەوار و وڵا چۊ پیەنی ڕووژێار،
ئەترەیل و دەنگەیل و ڕەنگەیل پیەک تیەنەو جواو لە یەک.
ئەترەیلێ هەن تەڕوتەرچگ، وێنەی لەش مناڵ کوورپەیل
شرین هەر چۊ کزەێ شمشاڵ، سەونز وێنەێ سەونزی چیمەنەیل.
ئەترەیل تر، وە تاڵان چێ، نیقەڵتووز یاگەر پیرووز بۊ،
وە پاناێ چشتەیل بێ‌بن، دنیا لە بن گرن لە وەر،
چۊ بوو ئەتر مشک و ئەنبەر، چۊ بوو هەسەڵ بەن و کوندەر،
گوورانی چڕن گشتێان، گوورانی شەوق هەست و گیان.
دژمن
جوانی م هەر هۊچ نەۊە بێجە کڕیوەێ تیەریکێ.
جارجارێگیش لیسکەیل خوەر، گوڵەگوڵە نیشتنە بانێ.
وەڵام واران و تەش بەرق، ژێر زەوەردێ دان لە یەک،
چۊنە ک لەێ ناو باخمە، میوەێ گوڵ وە دەمێ نەمەن.
یەسە م دی ڕەسیمەسە خەزان خێاڵەیل خوەم
ئێرنگە دی وەختە، باێەس م پەلام بێڵ و شەن بوەم
تا لەێنوو هاوارا کەم زەۊەیلێ ک لافاو کوتاس
و لە تێان، چاڵەیل قۊلێ لە وێنەێ گووڕ کەنیاس.
کی زانێدن، ئایا گوڵەیل تازەڕەوز خێاڵم،
لەێ ناو خاک شووریاێە ک چۊ ڕێخ سەرسراوانە،
قەزاێ رازڕەمزدارێ کەنە دی تا هاز و گوڕ بگرن؟
وەڵام هەێ داخ و هەێ هاوار! زەمان زنگانی هۊتا بەێد،
ئەو دژمن نادیارە، ک ڕۊ دڵمان ڕۊکنێدەو،
لە خۊنێ ک لە کیس دەیمن، سەوز کەێدن و گیان تێدەو پێ.