خۊنت ئەڕا گەڕی خاسە
مەتەڵ ئۊش : خاڵوو عەلی سەفەری
نۊسەر: موحەمەد حەسەنی نیا
له ساڵەیل فره دۊر له دەورەێ ڕاسان، پیاگی بۊ ک هە لە گەنی رووژگار و ڕەنج بێوەری خوەی ناڵانیاد و هناسی هەمیشه سەرد بۊ وهه كوومر کیشیا. رووژێ لە رووژەیل نان و تووشگ و قەێ و قەتار بەسا و کەفتەو رێ تا بچووە لای فریشتگ خەێر. سەردی سووی شەوەکیانی كەفت وه ڕیه و چى وچى. له ناوی رێ تەقیا وہ گورگێگەو گورگ سەر ڕێ له لی گرت و پرسی : کابرا ئووغر! وہ کوو چید؟
پیا وەت : چمە لای فریشتگ خەێر تا بزانم ئەڕا هەمیشه هناسم سەردەو نکم ناهمی و ڕەنجم بێوەره؟ گور گ وەت: منیش ئەرزێ دیرم، هەر وەخت رەسید وه خزمەت فریشتەێ خەێر ئەرز منیش وه یێ بڕەسن. وہ پێ بۊش م سالێ ێەێ جار گەر بووم، دەرمان ئی دەرد گەڕی منە چەس؟ پیا وەت: وه بان چەوم، وہ پێ ئۊشم .
لە نوو کەفتەو رێ و چی تا رەسی وە دیەکەیگ وتۊشی بۊ وە تۊش ئەرواوێگەو. دۆای کەیف خوەشی. ئەرواو لی پرسی : ئووغر، وه کوو چی براێ خاس؟ پیاێ رێوار وەت: چمە لای فریشتەێ خەێر تا بزانم ئەڕا هه هەمیشه هناسم سەرده و ڕەنجم بێ وەرە و نكم ناهمی؟! ئەرواو وەت: منیش ئەرزێ دیرم، ئەگەر دیدەی وہ پێ بۊشەی. وە پێ بۊش بەشێ له زەۊەگەم خەلیە خاس نیەتیەرێد و هەمیشە گەڕاڵە، توام بزانم خەلیەگەم له و بەشه ئەڕا سەقەت کەێد؟
پیا وەت: وہ بان چەوم، وہ پی ئۊشم . له نوو كەفتەو رێ وچى وچى تا ڕەسى وە شار فره گەوراێگ و بۊ وە مێوان حاکم ئەو شاره. شەو دۆای شامكەران ئەۆ و حاكم دەمتەقە كردن و حاکم پرسی : پیاێ خاس، خەێره؟ له كوو هاتیه؟ وه كوو چیدن؟ پیا وەت: چمە لاى فريشتگ خەێر تا بزانم ئەڕا هه هەمیشه، هناسم سه رد و نكم ناهمی و ڕەنجم بێ وەره.
حاکمیش وەت : منیش ئەرزی دیرم، ئەگەر دیدەێ وه پێ بۊش ؛ بۊش ک شه وان قەێ و قەتار بەسم و ساز و بەرگ لەشكەر ثامادە كەم ئەڕا جەنگ. هنای رووژەو بوود، بەتاڵمەو بوود و نيەتۊەنم بچم وە جەنگ . پیا وەت : وه بان چەوم، وہ پێ ئۊشم. پیا له نوو کەفتوە رێ و چی و چی تا … سه ر ئاخر ڕەسی وە لای فریشتەێ خەێر. دۆای حەوالپرسی،ئەرز خوەى لە هۊرێەو چی و ئەرز گورگ و ئەرواو و حاكم وه فریشته رەسان . فریشته هاتەو جوواو و وەت: حاکم شار
ئەڕا یە نيەتۊەنی بچوود وە جەنگ دژمن و بەتاڵێەو بوود، چۊن پیا نيیەو ژنیگەو ژنیش دڵ ڕەحمەو خوەشێ نیەتیەی خۊن كەسێ بڕشید. لەو بەش زەۊ ئەرواویشە ک خەلیەی سەقەتە، گەنجێ له یاقووت و زمرووت خەفتێه ک باێەد کەسێ دەرێ بارێد تا هەم بوود وە خاوەن گەنجیگ و هەم زەۊەگەی خەلیە خاس بەر بێەیدن . دەرمان دەرد گورگ گەڕيش مژين خۊن بنياێه مێ سائەقڵە. چۊن خۊن پياێ نەزان و سائەقڵ ئەڕا گەڕی خاسه. پياێ رێوار پریازەگەێ دا وه بن هەنگڵ و کەپەنەکە گەێ کرد له کوول و کڵاش ئەڵکیشا و کەفتوه رێ و له نوو وەرەو ولاتەو بۊ. هات وه گه وراشار و چی وه خزمەت حاکم و حاکم هات وە پیریێەو دۆای حەواڵپرسی لە جوواو فریشتەێ
خەێر پرسیار کرد . پیایش حاڵ ماجەرا وە پێ وەت. حاکم وەت: ئێرنگه ک فریشتەێ خەێر فەرمایشت کردێه ک م ژنم، بەو و مەردی بکه م بخواز و ت بوو وہ حاکم ئی ولات گەورا و ئاوەدانه. پيا له جوواو وەت: م نيەتۊەنم لەێره بووسم چۊن کارێ دیرم و لە نوو کەفتەو ڕێ و چی ڕەسی وە لای پیاێ ئەرواو و جوواو فریشتەێ خەێر وه پێ رەسان.ئەرواویش وەت: ئێرنگە ک لێواسە بووس تا وە یەكەو گەنجەگه دەر باریم و بەشت لە لی بێەم. پیا له جوواو وەت: م
نيەتۊەنم لەێرە بووسم چۊن كار دیرم و له نوو کەفتەو ڕێ و چی. هات وهات تا ڕەسی وه لای گورگ گەڕ و جوواو فریشته وە پێ ڕەسان . گورگ قۊته برد وه دەلیای فکر و وه پیا وەت : فریشته ێ خەێر چە جوواو وە پرسیارەگەی خوەتدا؟ پیا هناس سەردێ کیشا و وەت : ئەێ دادبيداد ئی هەمگه ڕێیە چیم تا لای فریشتەێ خەێر و لە هۊرێەمەو چی پرسیارخوەم بۊشم و ده رمان زام خوەم بكەم، ئەێ نەهات و ئەی نامەێ و ئاخرشەڕی وە خوەم . گورگ وەت: ئێرەنگە خوەت
بۊش ! نه زان تر و سائه قڵ تر له ت بنیاێەم ها کوو؟ ئمجا له جی ئەڵپەری و مل پیاێ سائەقل دەرشكان و خۊنێ تا ئاخرچووڕ ئەڵمژی.