د ماسی له ناو نقۆڵدان
نۊسه ر: عه لی ئه شره ف ده رویشیان
ئه ڵگه ردانن وه کوردی: مازیار حه یده ری
دۊیا نیمه ڕوو پە نشه مه بی. چۊ گشتێ پەننشه مەیل خامووش و دڵگیر و کەمێگیش خوەشی تاتیلی جمه .
ئاخرەیل پایز بی . ماڵمان هێمان نم داشت یەێ هەفته پێش لاو هاتۊد . باوگم وەژێر کورسی خەفتۊد. خوە ر له رۊ دیوارخەڕگین هسار رەنگ دانایاد، دڵم تواسیاد خوەر نەچوود. هۊچوەخت نەچوود و مەخشه یلەگەم خوەێان بنۊسریەن و باوگم خەفتۊد و نەڵسێدیش. هەر وەخت هەڵسیاد دەسپێچگ جووریاد و کوشتیادەمان. رخْ شەمه وە دڵم بی. ئەو هه مگه مەخش و جەدوەڵ زەرب و ئامووژار سە ردمێر و دەنگ ماس فرووش دەورەگەرد له کۊچه . ئەڕا هۊچکەس نەۊ ک دووسمان داشتوود؟ ئەمان بی . وەچگه پشیەیلێگ بین ک شەوان وە دزیەو بردیایمەناو جیه گەمان دەسەیلمان لسیانەو و ئەڕامان پرخْپاخ کردیان. ئەمان تا خافڵ بیایم، چیان و قەب گرتیانه پاێ بابا و لسیانه وەێ و بابا فڕەێان دیادەناو هسار. شعر مناڵ یەتیم ک کۊزەگەێ شکیاۊ؛ وەگەرد خوەمەو خوە نیام. کەفتمه هۊر مەلۊچکەگەمەو ک چەن رووژ پێش مردۊد. لەمەدرە سه هاتمەو مرد. هاتێ دەس گیر داۊد تا م لەمەدرە سه بامەو ئه وسا بمرێد. م ک هاتم کز بی. مووچ کیشام نات. چیمه نزیک ؛ سەرێ ناده بان زەۊ و مرد. خوەر ئاوا بیا، ئەگەر بچیامه
ناو ئاوشووران خوەر دۊنستیام ک هێمان له رۊ دیوارنانەواێ نەچۊدەبان. تاقەتْ دیشت چین نێاشتم، کورسی م چەسپانۊده خوەێه و . باوگم پرخْپاخ کردیاد، ورسێم بی، ئه مان داێه من و ئەکبەر قەسەم داۊد ک دەس وەنان نەیم. داێه وه لاڵکیاینه و وەتۊد: وە پیر وه پەێغەمه ر پۊل نەێرم دجاره نان بسێنم . ئی کەش وەتۊد: بۊشن وە ئیمام رەزا نان نیه خوه یم! ئیمه یش وساۊمەلاێ خوانچەو وەگەرد یەکەو وەتۊم : وه ئیمام رەزا، وه گیان داێه نان نیەخوەیم . داێه چۊده بازاڕ کولیچه پەزەیل تا کڵاشەیلەگه ک چنۊد، بەێده ساوکارەگەێ و لەپۊلەگەێ وەناو رێ ئەڕا شەو کەله پاچه بسێنێدن. ئەگەر دکان ساوکارەگەێ داێه بەسیاۊد فرە خەمینەو بیاد ، تا ماڵ گیرە کردیاد. رووژنامەگەێ قەێ دەر تەکان خواردیاد، وینەێ سێ گله مناڵ ک خرسْ قەۊێگ گرتۊنه باوشه و لەرۊ رووژنامەگه بی. خرس رەنگین و چاخیلگێ بی . دجارە کەفتمه هۊر
شعر مناڵ یەتیمەگه ک وینەێ له ناو کتاومان بی. دڵم تەنگ بی . یەێ چشتێ له ناو قوڕەێم بانْخوار کردیاد. له قوڕەێم هاته بان. هاته ناو دەمچەوم و لەچه وە یلم هاته دەیشت و دەمچەوم داخەو کرد، وە پشت دەس دەمچەوم پاکەو کردم، شووری ئەسر له پشت دەسم دەوی و کزەکز کرد . گووشەێ دەره گه وازەو بی. ئەکبەر کەپووڵێ هاورده ناو و ئیکەش وه تک پا
سڕیاده ماڵ و سەر نادەبن گووشم و پچه پچ کرد: دْ گله ماسی بۊچگ هاتنه سه ناو کیەنیەگەێ لاێ ئاوشووران. تیەید بچیم بگریمنان؟! وەبێ تاقەتیەو وەتم : بچیم، بچیم. یەواش بابا نایده خەوه و. تەکان ک خواردم کورسی جیڕەجیڕ سەختێ کرد. پرخْپاخ باوگم وساده و. هەناس من و ئەکبەر له سینەمان بڕیا. بابا ئی شان ئەو شانەو بی و بڕیاێ بڕیاێ ناڵان : ئەێ خودا
خه زەود له ئیمه دۊرەو بخە . هەئەوجووره نیشتیم و چەو بڕیمه بانْ کورسی. له بان کورسی یەێ کڵاف بەن کڵاش ویەێ گله دەرزی کەفتۊد. بابا دجارە دەس کرده پرخ پاخ . وه تک پا چیم و نقۆڵدان بۊچگێ ک له گووشەێ تاقچەبی، هێز دام. نقۆڵدان ته ره ک خواردێ له ناو ئاوشووران دۊمەو. وەگەرد ئەکبەرەو چیم. هەگ رەسیمه کیەنی شوونێ له ماسیەیل نەۊ.
دڵگران بیم . وه ئەکبەر وەتم : ها کووره ئەنۊ، دجاره دروو داید نادرس . ئەکبەر وەت : نادرس خوەدی، دڵنێام چینه سه ژێر گەناڵەیلەگه . دەس بردمه ژێر گەناڵەیلەگەو مینەێ کردم . ماسی زگ زەردێگ تەکان خوارد، ئەکبەر وه خوەشیه و وەت : وەێ ئیمام زەمان! ئەوه سرێه . نقۆڵدانه گە له ئاو پڕ کردیم. دووانی وه هەوڵ ماسیەیلەگە گرتیم. خوەر رەسۊده بانْ نانه وای. سووز و سەرماێ ئێوارە دەسەیلمان سڕ کردۊد . یەواش هاتیمه ناو ماڵ. داێه ناتۊده و. ناو ماڵ کەمێ تیەریکەو بۊد، بابا هێمان پرخْپاخ کردیاد. مناڵەیلەگەێ رۊ رووژنامەگه گومەو بۊن. یەواشێ چیمه ژێرْ کورسی. وەزگەو خەفتیم و نقۆڵدانه گه نایمه نووامان . ماسیەیلەگه وه چەوەیل زاغێانه و نووڕستیانه پیمانه و. ئەکبەر دەس برد و نقۆڵدانەگه وەرەو خوەێ کیشا. م دجاره وەره و خوەم کیشامەێ . ئەکبەر وەت : هن خوه من ها! وە دڵگرانیەو وەتم : نقۆڵدانەگەێ هن منه.
تازه خوەم ئەڕاد گرتمان . وه تنێگەو وەت : هن خوەمن . هن خوەمن . خوەم ئەوەڵ دیمانه و. یەواشێ وەتم : ئەنۊ نقۆڵدانەگەێ م چه ؟ وەت : هەێرەنگه چم و جامێ تیەرم . توواس هەڵسێد ک پاێ خوارده ئاگرڕشن ژێر کورسی. پرخْپاخ بابا ناتەمام مەن. وه خوسەو لچْ نەرم و بێ خۊن ئەکبەر گرتم و زوور دام و له هرسه و له رزیم . ئەکبەر قیژەێ خەفەێ کیشا « ئای، ئای » ماسیەیلەگه بێ دەنگ وساۊن و هه ئاو خواردیان . کورسی تەکان خوارد. بابا وساۊده بان سەرمان . چەوەیلێ چۊ چەو ماسیەیلەگه وه پێ هاتۊد. وه رخه و چیمنه ژێر کورسی و لافەگه وه ژێرەو سفت گرتیم . دْ مشت له پشت لافەو وەبانْ سەرمان هاته خوار . لافەگه وڵ دایم و وه قیژقاژ دایمه دەیشت . نقۆڵدان وەدەس باوگمەو بی. دەرەگه واز کرد و خسه ێ ناو هسار. ماسیەیلەگه له بان زەۊهاتنە پەلەپرتی . قڵاێ له بان خانێ قیڕان. هات و ماسیەیلەگه برد
له دۊر ئه وره یل ئاسمان سییةو بیان. له تیەریکی پلەیلْ بان خانێ نیشتۊم . پچه پچ بغزینمان دڵ تیه ریکی تلیشانیاد .
_ته خسیر ت بی .
_ته خسیر ت بی.
_ته خسیر ت بی.
_ته خسیر ت بی.
دڵم نۊچەو بیاد. له ئاوشووران دەنگ تۊله سەگ کوشیاێ بڕیاێگ هاتیا. داێه ناتۊدەو. هاتێ دکان ساوکارەگەێ بەسیاۊد و ئه
و هێمان چەوەڕێ وه پشت دکان نیشتۊد .
.