دیوارئاجووڕین
لهام شێرزادی
گشت چشتێگ له دیوارێگەۆ دەس پێ کریا؛ دیوارێگ ئاجووڕین، کە جوور مانتووە یل ساڵان پێشین تاڵکیشەو بۊ. نە یەک، نە دو، نە دە! چەنێگ لە ئاجووڕە گان سیەوە بۊن !؟ سیە نە، سوورتر! چمان هەرچێ چیامەو نوا کەوترە و بیان. هەنگاو وە هنگاو گەردما هاتیان . یەک-دو، یەک-دو… ئاجووڕە گان لەسەر کوڵانە گەوە کەفتۊنە شوونم ! ئەڵبەت م لەسەر کۆڵانە گەوە بۊ ک دیمە یان. چەن جار نووڕستمەو پێیان و چەو لە لێیان ژێر و بان کردم، خوە یان دانە ئەو ریەگەیا. رێک هەر چۊ خەوم هێمن و خۊنسارد تماشام کردن.
خوەر چیادە وە خوار، ئاجووڕە گان فەرترەو بیان و گووش منیش قوڵاختر! ئەڕا لە ناکاوە و هەست کردم… ئی ئاجووڕە یله چ خاس ناسم !؟ ریک چۊ ئەوچشتە ک لەناو جامەکا لە قۊلایی چەوە لیما دۊنم. شەوە کی و شەوە و کەمیل ترە کیش سەرلە نوو تا سەر کۊچە رە سانیانەم، تازە رە سیمەو ک چەنێگ دووسیان دێرم، لە تو فەرتر، لە داڵگ فەرتر، لە… تەنانت لە شێعرگانمیش، لە دە فتەرگە میش راس و پاکتر بین وە لما. چۊ جامە ک، خاستر لە جامەک. ئاجووڕە گان بییانە هاوشێوەی هەر چشتێگ : دووسەگەم، چەوە یلێ ، دە سە یلێ… بەی ڕووژ ک دڵم گیریاۊ، ئاجووڕە گان وە شێوەی جگەرە یگ دەراتۊن . ئەوان دی پەژارەی شەو و ڕووژم بین. خوە زیەو دی بتۊە نسیام فێران کەم ک هۊر لە منەو بکەن. ئیسە دی تا رە سیایمە بن کۊچە، سەرەوتا کردیایم و وە دەنگ بەرز گوورانی چڕیام، ئەوقەرە بەرز ک کەس نەشنەفتیاید! و دوارە گشت چشتێگ لەنوو دوجارەوە کردیایم. ئەو سا ک بایەس دی هەڵگڕیامەوە مـاڵ . ئاجووڕە گان وە چەوە یل ڕە ش بێ تاوانیانەو ئە گریان و چاوڕێ من و شەو کی نیشتیانە پشـت دەر و منیش رایان گڵاراو کردیام ! تا یە ک شەوێگ پاڵشتە گەم هێز دام و دی شەوە یلیش لە پای دیوار ئاجووڕینەگەێ کۊچە خەفتیام…