آوەفر
فرە زۊ بۊ، ئەقەرە زۊ گ خاس وە هۊرم نەمەنێیە ، هەر ئەقەرە وە هۊرم تێ گ شەو سەردێ بۊو و زوقوم خراوێ کردیا؛ وەفر دەمە کردیا و تەم خواردیا و هاتیادە خوار. چەوم خاس نەی، گامێگ نیام تا ئەو گامەگەم هەڵگردیام چەوم نەۊنیا لاقم نەمە کوو. گاجارێگ پا نیامە شوونەپاێ سەگەگەم یا گ پا نیامە شوونەپای خوەم. بایەس فرە بچیاتام فرە، ئەوقەرە چۊم گ دی هاز و حەرەکەت لە لێم بڕیاۊ. قەێرێگ پاس کردم بوو گورگ لە دۊرەو هاتیا قەبووزما. دەسێ کیشامە سەر سەگەگە تا دی نەگەفێ. دوجارە کەفتیمە رێ من و سەگەگەم یا من و خاوەنەگەم. شەو سەردێ بۊو و زوقوم خراوێ کردیا؛ وەفر دەمەکردیا و تەم خواردیا و هاتیادە خوار. بایەس بچیاتایم، لە شوون قەیرێگ تەپسوێ وتاقە بۊچکەڵەی دیاری دا، رووژنایی کوانێیەگەی لە دۊر دیار بۊ، تا ئەورە ڕەمیم، چما گ ئاگر کوانێیەگە لە دڵ من گڕیا. چوار پا داشتم چوارگلە تریش قەرت کردم و ڕەمیم؛ خاوەنەگەمیش وە شوونماهات. ڕەسیمنە لای وتاقەگە، سەگەگەم هەر قەبووز ساویادە دەرەگەیا. لە تەقەی دەر لە برسم هاتم، چێم دەر دامە لاوە و چە دیم ئایەم وەفرینەیگ و سەگێگ لە پشت دەر وسانەسە پاوە؛ لە پسا چۊ ڤێ ناو ئاو لەرزن، لە ناو دەرەگە لاچۊم و وەتم بانە ناو. چۊمنە ناو نیشتیمنە وەر کوانگەگەوە؛ کیش خوەم هاوردم و خوەم تەکانمەو؛ سەگەگە تمام ناو وتاقەگە کردە وەفر؛ یە توکە لەقە دام لە سەگەگەم و وەتم گوم بە گوم. لە لای خوەم وەتم چشتێگ ئەڕایان بارم هاتۊ ورسێیان بود؛ لە ناو دوڵاوەگە قەیرێگ تەرخنە و یە جام ئاو دامە پیاگ و وە جامێ ترەکیش ئاو نامە وەر سەگەگە. وەختێ ئاوەگە چەڵەپانمەو لە خوەشیا چما لە ئی دنیا نەۊم؛ لەوای کەسێ نان خواردیا چما دە ساڵ بۊ نان نەخواردۊ؛ یە جوور زاق چۊدە ناو چەومەو و تیکەگانم شماردیا نانەگە پەرت بۊە قوڕگم چما دە ساڵ بۊ بەن یبەشەر وە چەو نەۊد. هەڵسام و چێم ئەڕا نزیک کوانێیەگەو خوەم میت دام و دۊم کڵافە کردم و نامەێ بان پشتم؛ چەنێگ تین ئاگرەگە خوەش بۊ خوەزەو قەیرێگ سەر بناتامەو، شەکەت رێ بۊم؛ مقمەو بردۊ یانە کی بۊن لە کوورەو هاتۊن ئەڕا کوو چۊن کارێیان لە ئی وڵاتە چە بۊ؛ توخم سەگ چۊ زاق چێیەسە ناو چەومەو ئۊشم هەڵسم چنگ بنەمە قوڕگێ؛ لە هەڵات کوانێیەگە گیانم بەێەو داید و خەو گردۊەم قۊزەیگ کردم و دوجارە سەرم نامە بان دەسم؛ هەرچێ نووڕمە ئیانەیا فرەتر زاورم چوو نەگا هاتۊن من بکوشن، داخم لە کوورە زانن من وەل خوەما چە دێڕێم. ئەشێ فرە هووشم بوود؛ سەگ مەسەو چۊ جوور سەگێ بتواێ بڕمێدە کووڵ ئایەم دگان ڕیچەو کەێ و و نووڕێدە پێا، نەگا بتواێ بکوشێدەم لە کوو زانێ وەل خوەما چە دێرێم، ئەشێ فرە هووشم بوود؛ هەر پینکی دەم خوەزەو گڕێ بخەفتام بەڵام تا ئی خاوەن لاکردارمە نەخەفێ گ من نیەتۊەنم بخەفم، خوەزەوو زۊتر بتووپێ تا منیش وە خەیاڵ ڕەحەت بخەفم؛ ئەشێ هەڵسم وەرجە ئێ ڕێویارە هەڵسێد و قەتڵم بارێد و چشتەگانم بوەێ موتڵەقێ بووڕم، سەگەگەیشێ خەفتێیە دەرفەت لە ئیە خاسر هەردی ئەڕام نییە؛ خاس بۊ ئی چەقوە وە پیم بۊ، تا تواست بجمیەد جمانمەی، رێویارێ وێل زۊ تا ئیسە ها شوونمەو زانم؛ خوەی و سەگە پێسەگەێ جوور یەک تووپانمەیان؛ گەماڵ پێس، وەرجە ئیەگ کەسێگ بای بایەس چاڵێیان بکەم؛ گیانم وە ئی شاکوشە بۊە، ب ێپێیەر تا تواست بجویلیەد کارێ تەمام کردم، هاتێ دە ساڵ بوود ها ناو ئی کولانە، کی چوزانێ هاتێ کەسێ کلێ کردۊ لە ئێرە ماتەڵ من بوو، خاس تووپانمەێ، قۊزەی ئی سەگەنازگردێیشە لە گووش خوەم خستم، گەماڵکوشێ کردم، هەڵسم تا کەس دیاری نەیاس دەرچم؛ ئی بنیاێمە پێسە کەی فێر بوود گ پا وە مل دۊ ئیمەیا نەبایەس بنەێ، خاس وە پێیان کردم، قڕوژنەکێیان گلەگلە جایم، دی وە خەیاڵ ڕەحەت لە پاێ ئی کوانێیە کیش خوەم تێرم و تا شەوەکی خەفم؛ ئیانە جوور تەم هاناو هۊرم، فرە زۊ بۊ، وەفر دەمە کردیا و تەمەو خواردیاو هاتیا خوار جوور ئیمشەو ….