🗒دەم تەقەی من و مانشت/ دوکتور عەلیرەزا خانی/ ئەیوان – ئیلام + video

🗒دەم تەقەی من و مانشت

🔸دوکتور عەلیرەزا خانی

⛳️ئەیوان – ئیلام

📄 به زاراوەی کوردی کەڵهوڕی

ئمڕوو چگم وه‌ پای قوله‌ی سه‌رداران

دیم   یه‌   مانشته‌ ،  چۊ    جار  جاران

به‌رگێ   ڕزیاگه‌ ،  له‌        تۊله‌ داران

مات   و   خه‌م بار          نێله‌ سواران

چڕیم هه‌ی مانشت ، چه‌ن به‌گَله‌ربه‌گان

چه‌ن میر، چه‌ن تشماڵ، چه‌ن خان و سڵتان

ماد  و  ساسانی ،  چه‌ن  ئه‌‌ڤداڵ و خان

هاتن  وه‌  پاگه‌د ،  نیشتی له‌  میلکان ؟

هه‌ڵهه‌ڵه‌ی کام ئێڵ ،  ها  له‌  سه‌ریند؟

ته‌قه‌ی  کام  تفه‌‌نگ    لێه‌و   وه‌ریند؟

ته‌مه‌نگای کام باز ، مل به‌رزد که‌رده‌؟

سی سه‌مای کام ئێڵ ، ئێماند هه‌رده‌؟

پاتشای کام ده‌یر ، ماوا تید که‌رده‌ ؟

قیقه‌ی چه‌رخ کی ، هوشیارید به‌رده‌؟

ت  ماوای  گه‌ور  کام  کورده‌ ماڵید؟

ته‌مه‌نگا دۊر که‌ر کام سووسه‌ن خاڵید ؟

خان  سفره‌ شوور  میلکاند  کی    بۊ؟

داێم  سه‌ر به‌رزید ، هاوشاند  کی  بۊ؟

کی  له‌  ده‌وره‌ی ماد  ، گلد   داسه‌وه‌؟

چه‌ن  خان  ت  دیده‌  گه‌ن و خاسه‌وه‌؟

چه‌ن  ده‌ور  پاتشایل ، ژێرپاد کردنه‌؟

ناود    له‌  هۊر   مێژوو     بردنه‌؟!

شرینی  شێوه‌ی  کام  نازار   دیده‌ ؟

پیرید     دیاره‌     جوان      مه‌نیده‌

چه‌ن ئه‌فراسیاو ، چه‌ن رووسه‌م دیده‌ ؟

له‌  به‌زم  کام شا ،  سۆڕنا   ژه‌نیده‌؟

وه‌چ و وه‌چه‌رزای  چه‌ن ئه‌میر دیده‌؟

راسی  ته‌مه‌نگای  چ  که‌س  کردیده‌؟

ئرا کام سه‌ردار ، چه‌وه‌یل   ڕه‌ژیده‌؟

شێوه‌ت    ئڕا   کی  ،    ئه‌ڵڕزانیده‌؟

کام شا دڵت گرت ، دڵ وه‌ کی به‌سید؟

له‌ سووسه‌ن خاڵان وه‌ کامێان ره‌سید؟

زوڵف  کی  په‌شیو  خاترد  که‌رده‌ ؟

کام ئه‌سپ که‌ڵڕ ، هوشیارید  به‌رده‌؟

بێت  کام  شاێر ،  له‌رزان    سقاند؟

هووره‌ی کام تووه‌ مه‌له‌رزان گیاند؟

کام    حاکم   خاس ،  هاته‌  باڵیند؟!

ره‌فتار   کام  که‌س ،  بۊه   ‌ ئائیند؟

ڕاسی  تاریف که‌ر ، له‌ ده‌وران پێش

چۊ بۊن، چته‌ور بۊن، قه‌وم وخزم و خێش؟

تاریف  که‌ر  بۊنم  چوه‌  ئه‌ژنه‌فتیده‌ ؟

له‌  ده‌وران  پێش  هه‌ر  تو     مه‌نیده‌

مه‌زه‌ی  ئاو   کام   کانی    چه‌شیده‌؟

تافه‌ی کام ترنگاو ، ت     ئه‌ژنه‌فتیده‌؟

چه‌و  کاڵان  کام  ئێڵ      په‌سه‌ندیده‌؟

نازک   نه‌وهاڵان   کام     دیار د‌یده‌؟

نازار  کام ئێڵ ،  دڵ  وه‌   پید به‌سی؟

شازاده‌ی کام شار، ته‌ون تید ئه‌ڵوه‌سی؟

شکارچی  کام ئێڵ ،  که‌ڵه‌یلد   راو دا؟

کام سوار ، ئه‌سپی له‌ یاڵد تاو دا؟

جواو مانشت

م   له‌   ده‌وره‌ی ماد،  ناوم   نریاگه‌

له‌  ده‌وره‌ی زه‌رته‌شت، ناوکم بڕیاگه‌

…