📙شەو شێعر پێشواز وەهار
✍️ئەسرین شەفیعی 
⛳️ شار ئەێوان، پارێزگاێ ئیلام
⛳️سێشەمە 28/ 12 / 1403
هەم نەرمم و هەم سەخت لە وێنەێ ئاسن
هەم کانیێگم هەمیش دەریاێ بێ بن
هەرچگ خەم و ژان و زۆخۆ نا ئەو لا ڕام
ساتێ ک خوداێ پیاگ ناوم نا ژن
***
ڕووژێگ خوەشەو وە خان خانان کەێدەم
یەێ ڕووژ تیەڵەو لە بیل بانان نەێدەم
ئەر سێ چنە نوو زنەی بکەم هەم م نیەزام
هێزم لە چ لاێگ دەێد و ئەو کوو خەێدەم
***
گاجار ئڕا م نۆسنی هۆرم کەید
گاجار وەلێ لە دەور خوەد دۆرم کەید
عمرێگە ئڕاد مشتێ خاکم ک ئەوەڵ
سازیدنەم ئێجارەگە خاپۆرم کەید
***
دی سەبر بەسە، ئێ کەشە بەو کارێ کە
سانێ بخرەو پێ یا هە هاوارێ کە
دڵ وەختە لەنوو گووڵ بخوەێدن هەێ عەقڵ
بەو هەێکوچگێ کە لەێ لەشە بارێ کە
***
ئێ قەڵب فەقیرمە ک تیمارێ کەم
تاوان خوەمە هەر دەفە بیمارێ کەم
زانم ک تواسند خەتاێ گەوراێگە
هەر ڕووژ وەلێ دجارە تکرارێ کەم
***
شەو تا وەرەسوو، یەێدەنە بێدەنگ وارن
وارن وە ڕۆِ دار و گوڵ و سەنگ وارن
نەێرن خەم و ئێش و مەێنەتێ چاوانم
یەێ عمرە وە جی دڵەیل دڵتەنگ وارن
***
لەێ سۆکە خەریک ژین ئارامێ بۆم
هات ئەوقرە لەێ گووشە خوەنس خامێ بۆم
هەێ داد چەنێ دێر ڕەسیمەو هەێ داد
ئەۆ گورگ و م وەرک خاسێ ڕا شامێ بۆم
***
وەرقەو دڵ م لە بان ت دڕیاگە
لاێ خەڵک وە عشقت زەنگ م زڕیاگە
دی کەم بکە لارولەنجە بەو ڕا باوشم
هەێ مەرگ میەرەێ من و ت زۆ بڕیاگە
