📖هەر لە ئەوەڵەوە ڕێمان جیا بی!/ کاوە خوسرەوی

📖هەر لە ئەوەڵەوە ڕێمان جیا بی!

✍️کاوە خوسرەوی

 

تو لە ڕووژ نەهاتێگ هاتی

ئەی شەمشەمەکوورەی…

بن ئەشکەفتەیل هووز نیاندرتاڵ

ئەی دەمخۊنین گوشت تاڵ.

من وە هەڵاتن خوەر ڕۊەو ئاسوو چیم

هەر چیم و دنیا دیم

ئاشق ڕەنگەیل بیم

هەیران دەنگەیل بیم

تاریکی لە پشت سەر دیم

نۊر لە هۊرم پژانم و خوەم دیم.

تاج ئاگر لە سەر نام

پا لە شوونەیل خەتەر نام

چەم دەسم گرد و خستەمە شوون مانگ،

دارسان وە ڕێ سەوزا

تا ناو دڵ دڵنیایی بردەم.

من و تو هەر لە ئەوەڵەوە ڕێمان جیا بی

تو لە سای سەرد سایەڕ خوەد

نیشتەجا بید

ڕۊ من لە کەوکەوین ئاسمان، بەرزیی چیا بی.

**************

کووچ

ژیان مەل بێقەرارێگە

لە سەر لانەی شێویای گیان

ڕێوار  بێ ڕێ وەیلانێگە

لە سەر ڕێیەیل کووچ یەکسەرە،

کووچ هەنگاوەیل بێ ئامانج!

هەنگاوەیلێگ ک تەنیایی درەو کەن

وە پیر فەوتانەو چن و

وە سەر خەت نادیار  وەختا

بوونە بەیداخ هیچ

لە ناو ساڵنامەی ئمر وابردێ.

من هاوڕێ کاروانێگم

لە ناو سنوورەیل سەرگەردانی

لە وێنەی سەربازەیل بێ تفەنگ شوون جەنگ

هەتا پارچەیێگ چەرموو نەیرم

وە نیشانەی “مان” لە تەسلیم بیینا.

کووچ، ئاسوو لێڵێگە

گلارەی ئایەم هەراسان کەید

پایەیل بێزار بوون لە شوون خوەیان،

نیشتمان بوودە ئەزرەت دۊرێگ

دۊر .. دۊرجوور هەسارەیەیلێگ

ک وەر لە هەزار ساڵ نۊری مردنە.