📖شعر نەو/ لە کتاو: چەپکە گوڵ/ بەرهەم: شامی کرماشانی

📖شعر نەو

📖لە کتاو: چەپکە گوڵ

📖بەرهەم: شامی کرماشانی (1917-1984)

یا فەراق ئاخر کوشیدم یا غەمِ ئەشعار نەو

وەی دو دەردە ئەر نەمردم، دی نە لەرز دیرم نە تەو

ئاب و خاک قاڵب نەکەردە، گڵ وە پی ئۊشن نە خشت

زەحمتِ سەرمای زمسان ڕتبەی یەخ دەیدە ئەو

قسسەیِ بی مەغز و مەغزئازار و پووچ و بی لەزەت

دیم وە هەر جەمعی خوەنینەی ئەهلِ مەجلس کەیدە خەو

ڕەوغەن و گوشت و برنج و لیموو عەممانی و سیب

کەی وە خامی بود بخوەیدەی تا نەکریەیدە چڵەو

شاعرِ شیرین کەڵامِ شعر نەو! هەر یە بزان

عافییەت دۊرەن جە سەرکار ئەر بخوەید هەشت مەشکە ئەو

کاغەزی نفڵە، قەڵەم ڕەنجە و خوەد خەستە نەکە

ڕاهـِ تو وە ترکسان چوو ئەی عەرەب! بی خود نەدەو

قافیە سوڵتانِ شعر و قاڵب خشتِ سوخەن

خشتِ بی قاڵب، چ حاسڵ؟ موڵکِ بی سوڵتان خرەو

رووحِ سەعدی شاد ک نۊیسی کەس لە ئی محنەتسەرا

تا نەکیشد ڕەنج و محنەت، گەنج وە نەسیبی نییەو

سەد هەزار ئەفسووس کە بردم سەد هەزار حەسرەت وە گووڕ

باعسِ بەدبەختیِ من چەرخ دوون و چەترِ کەو

شعرِ نەو بایەد وە ژست و نازِ مەخسوسی خوەنی

ئەر وە مەردانە خوەنیدەی حەرف موفتە و ناحەسەو

شعر نەو کوهنە وە یادم برد، نیەزانم چارە چەس

قسسەیِ بی مەغزِ بەعزی مەغزِ شامی کرد خرەو

زمسان ١٣٤٠ ( 1961)