📖چیرووک بێ
✍️عەلی ئەشرەف دەرڤیشیان
📝هەڵگیردان: پدرام ئەسەدی
📖 سەرکەنی: هەفتەنامەی سداێ ئازادی
عەێد، یاواش یاواش مەهەت. ڤەگەرد دەنگ مەڵۊچکەل سەر دێوارەل مەهەت. مەهەت و مەنیشتە سۊک ئووتاخ دڵگیرە ئیمە. ئیمە فرە زۊتر ئەژ کەڵینگەل بوو عەێدە مەشنەفتیمن. بگر هاوا مێهرەبانترا مێڤیا. دی قولەل ڕۊتمان ڤە نام کۏش لاستیکی ڕچ نمەڤەست.
ئاوشووران ڤەگەرد وژ پووس پرتەقاڵە ماورد. پووس هەنارە ماورد. یەخەل بڵنگێ ئاوە مێڤیا؛ ئشغاڵەل ئەژ ژێر ڤێەر مەکەتنە دەیشت و پشیەل ڤە هەر دو کان ئاوشووران مڕەمڕ مایشتنە ڕێ. دی بوخاری مەدرەسە ڕووشن نمەکردن. دی ڤە کۊچەل ڤێەر نێڤی. ڤە جا ڤێەر، هەڕێ چڵپاو بی. ڤارانە مەهەت. تەڕە مێڤیامن ئەمان سەردمان نمێڤیا.
عەێد مەهەت ڤە سۊک دێوارەل، مەنیشتە لا سەۏزەل تازە جیقدریا. عەێدە مەهەت و ڤەگەرد هوڵمێ ک ئەژ سەر دێوارەل فیسریا هیزە مێارد، ئیمە ئاگادار هەتن وژە مەکرد.
یەکم جار هەتن عەێد باوڕ نمەکردیمن، ئەمان یەک ڕووژ شۏیەکی مەهەتیمنە هەسار و مەگستیمن جوور هەمۊشە ئەژ سەر ڤەفرەل هەۏز سوڕ بەریمن، ناکاو مەچوقیایمنە نام هەۏزەکە. مەزانستیم ک دی عەێد هەتێە و ڤە ژێرا ڤەفرەل هەۏز تاوانێە تا ئیمە فەن بەێ ک تا نامقەێ قۊتا بەێ.
ڤە هاڵێکا ک تا نامقەێ تەڕ بیمن، یاواش مەچیامنە ئووتاخ و ئەژ پشت پەردە ڤە ترسم لەرزم هنا مەکردیمنە دا ک بڕەسێە دادمان.
ئەژ سەرما و ترس بی ک مەڕکیایمن. ترس ئەژ یە ک نەکەێ باوە ئاگادار بوو. و یە دا بێچارە بی ک ڤە تەپڵەسەری شاواڵەمان ئاڵشتە مەکرد و هەر ڤە ئە هاڵە قورنجکە مەگردە لا ڕانمان و مێاردە نام سەر وژ.
ئیمە مەڕکیایمن و مێخ توڕ قورنجکەلە مێڤیایمن ک ژانە مەکردن و کاو بین ئەمان ڤەگەرد ترس؛ زریکە و قیژە ڤە نام سینەمان مەکپانیمن.
دا وژیشێ ڤە قیافە دەردەدار و پیچ و تاوێ ک ئەژ ژان مێاردیمنە وژمان خەمبارە مێڤیا و مێاردە نام دەمڕۊ وژ.
ئەمان خوو، نەبایس باوە ئاگادار بیاتا. ئەر مەسوزیایمن، ئەر مەکەتیمن و جاێکمانە مەشکیا و ئەر چێی گوما مەکردیم، نەبایس باوە ئاگادار بیاتا. و خەمڤەر هەمیشەیمان، دامان بی ک وژێ ڤتنی کول چێ “قۊتا مێارد” و مەڕشانە سەر جەرگ وژ.
هانە بی ک عەێدە مەهەت.
دا ئەڕا هەر کام ڤە ئیمە، مشتێ گەنم و نوژی مەڕشانە نام جام تا بفیسێ و دوماجار مەڕشانە نام مەجمە و پێەنە مەکرد تا سەۏز بوو. هەر ڕووژ سەرەکیشی جامێلە مەکردیمن و گووشە مەتەکانیمە دەنگ هەناسە گەنم و نوژی:
پس… فس… پس.. س
شۏڤان دا دەسە مەکردە گت و پێنە کردن و ڤە باوەمە مەۏت:
بایس زەمین هەناسە ئاشکار کیشاوی، هانە نیە؟
باوەم هەقاتی کەسێ ک ئاو سەرد ڕشانۊنە بان سەرێ، ڤەگەرد چوو سیکارەکەێ چناکەێ مەخوران و مەۏت:
– هە، ئاها، ئەرێ کیشایە.
گشت بێدەنگە مێڤیایمن. هانە بێدەنگ ک دەنگ هەناس نوژیەل نام جامە مەشنەفتیمن.
-پس… فس… پس… س
هەر شۏ قووڵەکێلەمان مەنیامنە بن گووشمان و مەلەقانیمن و ماوردیمێانە دەنگ. مەگستیم ڤە پشت دێوارەل هەڕێگین قووڵەک، نامدڵان بۊنیمن. ڤەگەرد وژمە مەۏتم:
ڕاسی بیەسە چەنێ ! نزیکە پڕا بوو!
کەس پۊل قووڵەکەێ هن وژێ نێڤی. ساڵێ یەک گل و یەک کەس بایس لەباس بسەنیا و ئەڤە کەسێ بی ک لەباسێلەێ فرەتر ئەژ گشت گت داشتۊ.
شۏ ڤە ژێر کورسی ڤەگەرد یەکا ئێ بابەت خڕین لەباس چکومڕە مەکردیمن.
فچەفچ ئەکبەر مەهەتە گووش ک مەۏت:
-های ئەسغەر! ئەمساڵ هن منە ها! داشی برا.
و ئەسغەر یاواشێ ڤەگەرد لاڵکە مەۏت:
پارەکە هن تو بی، براکەم، مەر نیە ڤیرت. ئەمساڵ هن منە؛ مەیتین تا گتێلەمان شمارە بکەیمن.
دوماجار ئەکبەر و ئەسغەر دەسە مەکردنە شمارە کردن گتێلە. ئەسغەر مەکەتە سەر ئەمان هەمباز پچەپچ و ڤزەڤز ئەوان مەهەت گووش.
پچ پچ پچ… پارەکە، پارەکە… پس… پس.. پچ پچ..-
ڤ ڤزز… گت گت… ڤزڤز…-
دوماجار کوتبڕ کورسی تەکان قورسێ مەوارد و دەنگ کرخە کەسێ ک بگر هەڵقێ زوورا بەن هیزە مەگرد. دا هاوارە مەکرد:
یا حەزرەت عەباس یەکتری تاسانن.
و باوە ڤەگەرد یەک مشت ک حەواڵە لافە لا ئەکبەر و ئەسغەرە مەکرد دەنگ کرخە ماوردە بن.
***
یەک ڕووژ نیشتیمنە دەم یەک. قووڵەکەل هاوردیمن. دا هەم هنە وژێ هاورد. چووار گلە قووڵەک بی دا ڤەگەرد تێشە شکانتێان. چەن گل پۊلەل شمارد. دوماجار ڤە شک تاماشام کرد. ئاخر پۊل من کەمتر ئەژ گشت بی. ڕێ پۊل دەرهاوردن ئەژ قووڵەک یاد گرتۊم. دڵەزیقی ڤە بێن گشت ئیمە بی. دی ئە خەم هەمۊشەگیە ک هەقاتی تاڵ بەن سێی یەکسەر ڤە چز لچ دا بی ڤجوود نیاشت. پۊلەل ڕشانە پەڕ چارچێڤەێ و ڤەگەرد یەکا چیمنە بازار.
خێاوان چەنێ خاس بی! دوکانەل کولیچە پەزی. چ بووەل خاسێک! کولیچەل ڕۊنتاو، نوقوڵ چوکوڵیەل ڕەنگاوڕەنگ، ترش و شیرێن، سەقز.
ڤەگەرد وژمە مەۏتم:
-ئەر کەڵینگا بیم، ڤە خودا کول پۊلێلەم مێەمە کولیچە ڕۊنتاو
ڤە ئەکبەر مەۏتم:
-تو ئەر کەڵینگا بین چە ڤە پۊلێلەتە مەکەین؟
-مێەمە ترش و شیرێن. ڤە ئیمام ڕەزا هەر شۏ مەچمە سینەما. هەر شۏ.
هەر هانە ک ئاو دەم قۊتە مێارد و لەت نانێ ک هاوردۊە گەرد، مەکیشا دنان، ڤە منە مەپرسیا:
راسی کەێ کەلینگە مەۏیمن؟
مەۏتم:
ئایم بایس چێ فرە بێەرێ تا زۊ کەڵینگا بوو.
ئەکبەر ڤە نائومێدی مەۏت:
-سە، ئیمە هۊچ ڤەخت کەڵینگا نمەۏیمن. ئەێ داد بێداد
***
ڕەسۊمنە دوکان کوت شاواڵ فرووشی. دام داشت ڤەگەرد خاون دوکان قسە مەکرد و ئەسغەر نیشانە مێارد.
کت شاواڵ فرووش، هانە ئەکبەر هایشتە چەم ک بگر مۊش خورما دۊیا. دوما یە تاماشا کردنێ تەمام بی، ڤە سۊک دوکان، چوو درێژێ هیز دا و یەک دەست کوت شاواڵ گوجین ئەژ سەقف دوکانەێ هاوردە وار.
ئەسغەر ڤە دەس مێەت دا، کوت شاواڵ کردە ڤەر و دو سێ گلە سوقوڵمەیش ڤە دام وارد. دوما یە دوکمەێ بەستن، بگر ئەکبەر دێرێ حەڵقێ فشارە مەێ کەتە خڕەخڕە.
دا ڕۊ کردە کوت شاواڵ فرووش و ڤت:
براکەم یە فرە تەنگ و ترشە. یەک تر بار. ئیسکە ئایلەم خەفە مەکەێ.
خاون دوکان دووارە لەباس کردە سەر چوو و هەر هانە ک پت قڤینێ ڤەگەرد دەرباڵێ پاکا مەکرد، ڤە ئە بانە، کوت شاواڵێ تر هاورد.
کوت شاواڵە بەدڕەنگێ بی. ئەسغەر دڵ نێڤیتێ ئەڤە ئەڕای بخریمن. چوون هەنێ دام کوت کردە ڤەرێ، ئەسغەر وژ چەفتا گرت. دەس ئەژ باڵ کوت ڕەد نمەکرد. یەک شانێ ئەژ حەد ئاسایی بانتر گرتۊ. دا هەرچێ ڤە زوور شانێ مەۏردە وار، ئەسغەر هەم شان مەۏردە بان.
دو سێ گلە گرمچە ئەژ دا وارد. ڤەگەرد مشت، قایم مەکوتە سەر ئە شان ئەسغەرە ک ڤە بان گیر داوی، تا گاس ترازا بوو ئەمان هەم دوارە ماتە سەر جا ئەوەڵێ. ئەسغەر لەم وژ بادە مەکرد تا دوکمەل نەڤەسێرێن، هالیپا دوکمە ئاخر نەڤەستۊن ک مەکەتە خڕەخڕ.
ڤە بوونە داواکاری دا ئەۏیشەم ئاڵشت کردن. من و ئەکبەر چەم خڕ دایمنە نام دوکانە. چ کوت شاواڵەل خاسێ! قەوارە من قەوارە ئەکبەر. ژەنەل تریش ڤەگەرد ئایلەلان ئەڕا خرین هەتۊن.
ناکاو هاوار ئەکبەر هیز گرت. چۊ هاوار کەسێ ک هەڵەپەت بۊ یان کڵاژدم داۊتێ رن. گشت دڵ نگەرانا بین. کوت شاواڵ فرووش، دەسێ لەرزی و یەک گلە کوت ڤە سەقف کەتە بان سەرێ. هراسان ڤەرێ ئەکبەر چیم. دیارا بی ک یەک ئەژ ئایلەل کەل ئەڕای کەتێیە و قەپ داسە نانە دەس ئەکبەر. ئیمە ڤە خێاڵ دەسێ قەپ گردێە ئەمان نە، تەنیا قەپ داۊتێ نانەێ.
ئایلە ڤە لەرزا ڕەنگ پەڕیا ڤساوی و ڤە سەختی نانە مەجایا، دای ناکاو ڤە قەیزا گرتێ و ڤەگەرد چنگڕ گوڵ هایشتە گوپەل زردێ. دوماجار ڕمانتێ و شاواڵ ئایلە کیشا وار ڤەگەرد دنان، ڤەپ گرتە نامڕاس رانەل چەرمێ و بێ خۊنێ. دا ڤەگەرد بوقز چریکانە سەر ژەنەکە:
ئەڕا ئایلە مەکوشین داڵکە گیان؟ مەر کفر خودا کردێە؟ عەۏ نەیرێ.
دوماجار ڕۊ کردە ئەکبەر ک ڤەی بەزمە چڕشکیاوی و ڤەگەرد قەیز ڤت:
تفە ڕۊت! نان کوور! مەر چە بی؟! ڤە گووشت گیانت وارد؟
ژەنەکە هاوارە مەکردە سەر ئایلەێ:
ئەێ گیا گوسنە. ئە لەمتە مەیڕم. مەر شۏ باوەت نایە ماڵ.مێەم سێخ داخ بکێە نام لەمت.
لەت نانە، فیسریا ئەژ لێر دەم، کەتۊیە ژێر پا.
قرمقاڵ ڤەت و ئێ سەر داواکاری دا، کوت شاواڵێتر ئەژ سەقف هەتە وار. قارارە بی. هاوگل کردیمنە ماڵ.
***
کوت شاواڵ هایشتیمە قەێ دێوار ئووتاخەکەمان. ئەسغەر ساتێ یەک جار مەچیا، سەنووق گوجینێ ک داشتیمن، مەیشتە ژێر پا و گیفانەل کوتەکەی سەرکیشیە مەکرد. شۏڤانیش ک گشت ڤە خاو بیمن دەس ئەژ کوت شاواڵەێ نمەکیشا. لەت قاقزێ ڤە یەکێک ئەژ گیفانەلێ پەیدا کردۊ ک ڤە بانێ نۊسریاوی (36)، ئە قاقزە ئەکبەر ڤەرێنێ دزۊیا و تا چەن ڕووژ ڤە سەرێ قاڵ بی.
ئەسغەر خێاڵە مەکرد ئە قاقزە هەمۊشە بایس ڤەگەردێ بوو. لەتێ قاقز پەیدا کردۊ ڤە بانێ نۊساوی(32) و هیشتۊیە گیفانێ ئەمان یە ڤە ئەڤە نمێڤیا و دایم پەڵپە مەگرت و ڤە ئەکبەر مشتە مەوارد. سەد گل فرەتر گیفانەلێ جوورست.
***
شۏ عەێد ڤەگەرد بوو برنج پاڵێریا، بوو ئێرەخ جەستە دتەل ماهات. ڤە نام ئە شۏڤەلە دەنگ ئاه مەهەت. گاس دەنگ ئاه دار ئەمروو ماڵ هامسا بی ک شکوفە مێارد. هایتر دەنگ ئاه کۏ پەڕاو بی ک ڤەفرەلێ مەتاویا و گاس دەنگ ئاه دا بی.
دەنگ تەقە و گولە و گوڵاو پاش و پیاڵەی مەهتاب و پاپیچکەل، شۏڤان شار پەریشانا کردۊ.
شۏ عەێد ئەڕام فرە دڵگیر بی.
مەنیشتیمنە سۊک ئووتاخ. باوە گوڕ ئای گوڕ سیکارە مەکیشا. دا شەکەت ڤە کار و بار ڕووژانە مەچیا ئیلا و ئەلا و برنج مەپاڵان.
باوە تاماشا ئیمە نمەکرد. سەرێ ڤە وار بی.هەمۊشە پالتوەکەێ مایشتە سەر شانێ و ڤە سۊک ئووتاخ چوماتە مێارد و مەچیا نام وژێ.
ڤە دەیشت، فشفشەل کڕە مایشتنە قەی تاریکان ئاسمان. قاڵ و زریکە و هاوار ئایلەل مەچیا ئاسمان. من و ئەکبەر و ئەسغەر یاواش یاواش و ڤە دزی وژمانە مەکڕانیمە پشت شۊشە ئووتاخ.هەناسە ڤە سینە مەکپانیم و ئەژ چز شۊشە ماق دەیشتە مێڤیایمن. وژمان ئەژ یادە مێڤردیمن.ڤەگەرد فشفشەل سەرمان تا تاق ئاسمان مەچیا بان هەر بگر وژمان ئاگر ڤەرنان مەکردیمن. منە مەۏتم:
– ئە، ئە ئاسارەدارە هن من بی.-
ئەکبەر ڤە زۏقا مەۏت:
ئەواکەیش هنە منە.
و ئەسغەر وژە مەکردە خاون فشفشە بێ ئاسارەێک.
ڤە سەر فشفشەل مەرجە مەکردیمن ک کامان ئاسارەدار و کام بێ ئاسارە بین. مەرج کردن بانە مەگرت.هەناسە ڤە قەفەسە سینە مەپەڕیا دەیشت و ناکاو باوە، هاوارە مەکرد، مەخوڕیا سەرمان و مەۏت ڤە لا شۊشە دۊر بگریمن.
هەڵەپەڵە ماتیمنە سەر جاکە وژمان و ڤە دەنگ تەقەل ک دۊر و نزیک ڤە نام ماڵەل و کۊچەل مەتەقیان دڵخوەش بیمن.
***
بیە عەێد. شیرینی واردیمن. سینە ژان گردیمن و کوشتن واردیمن. قووڵەک نوو سەنیمن و چەمەڕێ ساڵێتر نیشتیمن تا ئی گل گەی کی بوو.
دۏراندۏر مل ئەکبەر سۏرا بۊ. ئەخنکە یەخە کوتەکەێ زۏر بی. تەعتیلی فرە زۊ تەمام بی.
بن گیفانەل مەجووریایمن و پڕۊشەی خاکە کولیچە ڤەگەرد مۊ چرکن ماوردیمنە دەیشت و ڤە حەسرەتا مەواردیمن. دام ئەڕا ئەکبەر یەخە دۊران و ملێ ڤە زەخما بین نەجاتا دا.
شۏڤەلێ ئاخر مەنیشتیمن و تون تون مەشقێلەمان مەنۊسیایمن و گرێ مەکردیمن. گرێ ئەڕا ڕووژەل ڤە دەس چی، ئەڕا شیرینیەلێ ک دی نێڤین، ئەڕا تەعتیلی ک دی تەماما بۊ و ئەڕا مەشقەڵێ ک نەنۊسریاۊمن.
***
دووارە مەدرەسە چین شروو بی. کورسی دی ڤە نامڕاس ئووتاخ نێڤی. بگر چێی گوم کردۊمن. باوەم شۏڤان مەنیشتە سۊک ئووتاخ.سیکارە مەکیشا و شعرەل بابا تاهێر عوریانە مەخوەنیا.
چەن ڕووژێ بی ک ئەسغەر وژێ ڤە ئیمە مەشاردا.دزەکی مات و دزەکی مەچیا ڤەگەرد هۊچ کەس شەڕ و شووخی نمەکرد. بگر یێ لا لەشێ فەلەج بۊ.کتاوەێ یەک لایی مەگرد وماتە ماڵ.کەس نمەزانست کوتەکەێ مەنێیە کوو.
ڕوخسارێ پەکەر و خەمین و رەنگ پەڕیا بی. ڤەگەرد ئیمە کەمتر قسە مەکرد. دا دو سێ گل ڤە بنێ ڤتۊ یەخە کوتەکەی بارێ تا ئاڵشت کەێ و بشوورێ، ئەمان ئەۏ تەنیا ڤتۊ “یەخەکەم پاکە”.
یەک ڕووژ ک ڤە مەدرەسە ڤەرێ ماڵە مەهەتم، حوسێن، یەکێک ئەژ هامکڵاسیەل ئەسغەر دیم.
ئەۏ وژ ڕەسانە بنم و هەر هانە ک هەسە هەسە مەکرد هەڵەپەڵە ڤتە بنم:
– براکە ئەسغەر! مەزانین چە سەر ئەسغەر هەتێە؟
-نمەزانم، زۊترا بووش چە بیە!؟
تاماشا دۏر وژا کرد و ڤەگەرد منەمن ڤت:
-ئەسغەر “بێ” قێڤینێ سەنێە و نیاسە نام گیفانێ. ئیسکە هەفتەیکە ک ڤە نام گیفانێ نمایە دەیشت. هەنێ مەچێە پا تەختە کتاو دەفتەرێ ڤەگەرد وژا مەۏرێ مەگرێە بان گیفانێ. “بێ” فرە کەڵینگە. هەنێ مەنیشێە مل نیمکەت، سەنگەلا مەنیشێ تا ئایلەل لادەسێ ئەزیەت ناون.
بگر ڤەگەرد جاڕوو دانە نام کەپووڵم. بڕەم بڕەم چیمە ماڵ و ڤە دا ڤتم:
-“بێ” نام گیفان ئەسغەر گیر کردێە و نمایە دەیشت.
دا گڕێ هاج و واج تاماشام کرد و دوما یە زانست چە بیە، ڤە ئاخ و داخا ڤت:
-ئاخ، ئاخ “بێ” ڤە کوو چیە نام گیفان ئە “بێ” ڤەر باوە سەگە؟
جەریانە ک ڤتم دا فرەتر پەکەرا بی. ڤەی ڤەختە ئەسغەر، ڕەنگ پەڕیا ڤە ڕێ ڕەسی. کتاوەێ گردۊیە بان گیفانێ و ڤە نام فکر سڵام کرد. دا ڤت:
-سڵام و سەر پەنام، بوورێ گیفانت بۊنم.
ئەسغەر لەرزی. ڕەنگێ سفێدترا بی و ڤانگ دا گرێ کردن.
کوتەکەی دراوردیمن و نیامە سۊک ئووتاخ. دەنگ قرمقال ئیمە ک فرە بی، هامسا ئووتاخ بڵنگ ئیمە ک باوە حوسێن هامکڵاسی ئەسغەر بی ڤە ژەنەکەێ پرسی:
-ئی گرێگاوە هن چێیە ژەنەکە؟
ژەن ڤە شۊیەکەێ ڤت:
-های های خەڤەر نەیرین بەدبەخت؟ “بێ” ڤە نام گیفان کوت نوو ئەسغەر گیر کردێە. یە قەد هەفتەیکە! هاینە کوو!
***
شۏ هەقاتی باوەم، سەنگین و بێ ئاز و ڤرسێ ئەژ ڕێ مەهەت و ئووتاخەمان پڕە مەکرد. بێدەنگ نیشتۊمن و بێجەز خوڕە خوڕ ئاوشووران و ڤەقە ڤەق سەگەل هۊچە گووش نمەڕەسیا.کوتە ئەکبەر ڤەگەرد “بێ”نام گیفانێ هیشتۊمنە بڵنگ ئووتاخ.هەنێ باوەم ئاگادار بی ، چەن گلە سیکار پشتەپشت کیشا. خەڤەر دانە مەموو پیرە تاگەر بای. مەموو پیرە و بی بی هاتن. ڤە دۏر یەک بێ دەنگ نیشتمن.
مەموو پیرە پرسی:
-چەبیە، خێرە؟
دا ڤە بەدبەختی ڤت:
-خێر بۊنین ڤەلا.یە قەد هەفتەیکە “بی” کەڵینگێ ڤە گیفان کوتە نووەکە ئەسغەرێ گەن کردار گیر کردێە.
مەموو پیرە تاماشای ڤە کوت ک گیفانێ جوور دومەڵ کەڵینگێ هەتۊیە بان کرد و ڤە تونیکا ڤتە ئەسغەر:
-خوزگە “بێ” ڤە نام لێخەرووت گیرە مەکرد تا ڤە دەست راحەتە مێڤیایمن.
دوماجار مەموو پیرو دەس دا قەی دومەڵ.
من و ئەکبەر ئاو دەممان قۊت دایمن.ئەکبەر ڤە سۊکێ ڤساوی و مەڕکیا. دا رۊ کردە بنێ و ڤت:
-لابد کاسە قنگتیش شکیایە.ئەڕا نمەنیشین مردێ تۊن ڤە تۊن بی.
ئەسغەر نیشتە سۊکێک و کز کرد.باوە قەیرێ ڤەگەرد کوت بی و نائومێد ڤە مەموو پیرە ڤت:
-ئیسکە چە بکەیمن؟ئاخر خاس نیە هەر ڕووژ ڤەگەرد ئی لک لا نامقەیە بچووە مەدرەسە. ڤە نام مەردم خاس نیە.
دا ڤە قەیز ڤت:
-بیلا تا ئاخر ساڵ هانە بچێ تا تەوبە کار بوو.
بی بی رۊ کردە ئەسغەر و ڤت:
-ئایل ڤە ئی کەڵینگیە!چ کارەلێ مەکەێ “بێ” ئەڕا چەت بی، لەمت کونا بوو، دڵ و جەرگت بکۏیە نام لەگەن.
مەموو پیرە ڤت:
-چەخووێ بارن بۊنم.
باوەم ڤت:
-مەێ چە بکەین، کارێ نەینە دەسمان.
مەموو پیرە ڤە قوڕاتیا ڤت:
-ئەر عەلی وشترەوانە، مەزانێ وشتر ڤە کوو بێەسێنێ. لابد کارێکە مەکەم.
بی بی، پیرنازێ کرد و ڤت:
-کوت کوڕە نەیڕنین، شەڕێ ڕیشت بگرێ.
مەموو پیرە بگر چێی نمەشنەۏێ، چەخوو ئەژ دا گرت.
ڤەگەرد دەس لەرزانا، چەخوو کردە نام گیفان کوت. زەردی “بێ” دیارا بی گشتمان مل بەرز کردیم و تاماشا کردیمن.
مەموو پیرە دەس ڤە کار کیشاوا، چەم بڕیە ئیمە و ڤت:
-مەیلینان نۊتکێ نۊر چراخ بای یا نە؟!
چەخوو چوقانە ئە لاێ ڤە “بێ” ک دیار بی و زوورکرد رێن. ناکاو چەخوو سوڕیا و ڤە نامڕاس کوت دایتێ دەیشت و…
ئاخ خ خ خ خ…
یە ئاخ گشتمان بی. چەخوو یەک دیم کوتە دڕانۊ.
بی بی بامچەی دا بان سەر مەموو.مەموو پیرە سۏرا بی. “بێ” هەتۊیە دەیشت، ئەمان چ سوود.
گشت پەکەر نیشتۊمن. دا سێف زەمینی کوڵیا پووسە مەکەن.
ژەن هامسا ڤە دەر ئووتاخ سەرکیشا نام و ڤت:
-تون خودا کوتە ئەسغەر بیە چە؟
ڕوخسارەل ئیمە ک پەریشانا دی، بێ یە چەمەڕێ جوواو بوو، چی. دەنگێ مەهەتە گووش ک ڤە شۊیەێ مەۏت:
-ڤە نەزەرم ئی “بێەکە” کارێ دا دەسان. تەکانێ بێیە وژت بچوو بۊن بزان چە بیە پیاکە!
ئەکبەر و ئەسغەر نیشتۊنە سۊکێ و داشتن فچەفچە مەکردن.ئەسغەر ڤە هەر شێڤەی بی “بێ” هاوردۊە دەس.
-پچ پچ…بش بش…بی بی…
-بەبە…بس بس…
ئەکبەر یاواشا مەۏت، هەر یەک قەپە مەم ڤە خودا هەر یەک قەپ.
بێ دەنگی بی و ناکاو زریکە ئەسغەر چیە هاوا. ئەکبەر ڤەگەرد “بێ”کلک ئەسغەریش قەپا گردۊ.
بەهانە کەتە دەس باوە و توفانێ ئەژ کوشتن واردن ڕشانە سەر ئەوانە.
هەڵگیردان: پدرام ئەسەدی
