✅دیمانەی «وەهار» وەگەرد نێعمەت زەحمەتکێش لەبارەی ناونان زاراوەی کوردی خوارێن
– ئەڕا ڕای جیاواز لەبان بەشکردن زاراوەیل کوردی فرەس و چە تۊەنیم بکەیم؟ ئایا ناونیشان «کوردی خوارێن» ک ئاوێتەی وەسفیێگە، لە ڕۊ مەنتقەو دڕسە؟
بەشکردن جۆغرافیایی زاراوەیل کوردی بابەت تازەیگ نییە. ساڵانێگە لە جی کوردی سۆرانی، کوردی ناوڕاس یا کرمانجی ناوڕاس یا ناوێن، و لە جی کوردی کرمانجی، کرمانجی ژووروو وتنە و ئۊشن. کوردی خوارێنیش هەر لە درێژە و شۊنکەفتن ئەو بەشکردنەیل جۆغرافیایی زاراوەیل کوردیەسە.
– لەبارەی ناونان زاراوەی کوردی لە کرماشان و ئیلام و لوڕستان و خانەقین تا ئیسە ناونیشان «کەڵهوڕی» لە لای گشتێگەوە پەسەن نەکریایە. ئەڕا لە دریژای مێژوو ناو گشتیێگ لە ئی زاراوە نەنریایە یا ئەگەر نریایە، چە بۊە و ئێسە ئەڕا ئەقەرە جیاوازی هەس؟
کەڵهوڕ ناو ئیڵ گەورایگە و ناو زاراوە نەیوە. لە ویەردەیش ئێ ناوە زوورم هەر ئەڕا ئیڵ وەکار هاتیە و هێن زاراوە نەۊە. هووکار ئیە ک ئەڕا ناوێگ تایبەت ئەڕا زاراوەی کرماشانی و ئیلامی نییە وە ئی مدووە هەڵگەردیەیدەو ک کوردەیل ئی ناوچە و وە گشتی کوردەیل باشوور کوردستان خوەیان گیرۆدەی چوارچیوەیل تەعەسووبی ئیڵی نەکردنە و لە جی ناو ئیڵ ئەڕا خوەیان ناو نەتەوە وەکار بردنە. مەسەلەن لە ویەردە وەرجە ئیەگ فکر پان ئیڵی باو بوود، ئەگەر لە هەرکام لە کوردەیل ئی ناوچە ڕەگەز و نەتەوەی بپرسیاتاید، هیچ وەخت لە جواو، ناو ئیڵ خوەێ نەوتیا و وتیا من کوردم. لە ڕاسی یەکێ لە هووکارەیل گرینگ نەبۊن هیچ ناوێگ ئەڕا ئی زاراوە لە ویەردە تا ئێسە ئیەسە ک خەڵک ئی ناوچەیلە خوەیان وە کورد زانستنە و زاراوەی خوەیان وە کوردی ناو بردنە.
– ئەڕا ئاڵشتکردن (گوەڕانن) ناو و پێاکردن ناونیشانێگ ک گشت پەسەنی بکەن، چ هەنگاو کرداریێگ پێویستە و چ ڕێگ بایە بگریم لەوەر؟
لە ڕاسی ئەڕا ئاڵشتکردن، ناو ڕاسەقینەێگ بێجگە لە کوردی ئەڕا ئی زاراوە نەۊە ک ئاڵشتکاریێگ ئەنجام بگیرێد و خاسترین بژاردە ئەڕا ئی زاراوە هەر ئی «کوردی خوارین»ـەسە و پێویسە ئیمەیش جوور ناویل کوردی ژووروو و کوردی ناوڕاس، کوردی خوارێن وەکار بوەیمن.