هەڵبەسێک لە کەیوان ڕەحمەتی (هیوا)

دە قیلی بێ‌دەنگ جەهان

کل‌کلە ڕێژۆن عشق تو‌ بی

ک ئەڵچرچەنەم.

دە سەردەم جەولان دەسەیل یاخی

دەسەیل تو بین

ک گرتنم ڤ باڵووش و ته‌ز ئەژ گێونم شریقە دا ڤ دەر.

ئاخ نیەسەد و

جەهان چکچووڵە.

جەهان بێ تو

بێ دەنگە

تەریکە

ڕەشە

غەریڤ و تەنگە.

ئاخ نیەسەد و

جەهان چکچووڵە و تو نەێزونی.

تو نەێزونی ک جەهان یەخ دایەسەو

ڤەرەسەم کەڕەپی گرتیە

ئاخ تو نەێزونی دەرینم چ ئشکەفت بێ بنیکە

لێوەیلم تووس گرتنە ئەژ خەنە

ئاخ تو نەێزونی ئەژی حاڵ گەنە.

ئەێ گوم بیەکێ دێلڕونیم

ئەێ ڤ جا مەنەکێ ڤێرۆنیم

دە کوو بجووڕمەت؟

دە کوو بجووڕمەت؟

دە کوو بجووڕمەت؟

دە ناو دەنگ مەلیچکەیل ئێڤارە جومعە؟

دە ناو عەتر ِ غەزایلە داڵکم؟

یا دە ژێر گێس دوتەیل دەبستانی؟

ئاخ

دە کوو بجووڕمەت؟

ئەمکە ک

زوان ئەژ بێ‌دەنگی ژەنگ گرتیە و

زیقەی چەوم دیای ڤەر دینت

دوت ڤڵات ئافتاو

تو بەش دە کوو بجووڕمەت؟

هەڵبەسوان: کەیوان ڕەحمەتی (هیوا)