📕هەڵبەست کوردی/ فەرهاد شاهمورادیان – کەڵهوڕی + video

📕هەڵبەست: فەرهاد شاهمورادیان

خش خش خش خوەروەێشتم شوڕ شوڕ شوڕ وارانم

سەد دەلیا ها سینگ سەد ئاگر ها گیانم

والۆلە ها سەروەن ئاسارە ها خورجین

شاهوو ها شاڵ م گوڵ گوڵ ها گیفانم

دەم دووگە گوڵباخی چەم دووگە سووسەن گوڵ

دەس دووگە گوڵهیروو دڵ دووگە گوڵدانم

شێرێ ها شانەێلم مارێ ها تیر پێشت

ئەسپی ها رانەێلم گورگێ ها چاوانم

دەس دامە خاک خوەم برم ئەل خوەم دام ئەویان

دەس نامە خۊن خوەم چەم ئەڵ خوەم نۊقانم

خوەم گیانسین مردەشوور خوەم قەورم ئاگرتم

خوەم داڵگ خوەم بەوگم خوەم خوەم ئەوزایانم

رۊ ئسپێ: ئەنجیلم چەم قرمز: شانامەم

پەڕ سەوزم: جبریلم سەر هۊیلم: شەێتانم

دەس پێسم دڵ پاکم هەم کیەنی هەم قەوزاق

ئەمناکم سیەمناکم هەم جامەک هەم سانم

شمشاڵێ ها شاڵ و شمشێرێ ها قەێوەن

کەڵپووسێ ها کووڵ و کەشکووڵێ هەو شانم

ئەر ژینە: تازە سۊر ئەر شینە: کوڕمردگ

ئەر دینە: پەێغەمەر ئەر چینە: قاقانم

سەوزم سەوزم کێشتم ئازادم ئابادم

زەردم زەردم خێشتم دەسگیرم وێرانم

ئەوڕەم ئەوڕەم ئەوڕەم دامم دامم دامم

ئەڵچن ئەڵچن ئەڵچن دانم دانم دانم

ئەر مشکم ئەر پشکم ئەر ئاوس ئەر هشکم

سیسرکم یان وشکم گێشتێ بێتاوانم

ئێ دونیاێ چەڵمووکە تیەریکەو تەنگ و تورش

توک دام ئەڵ ئێ توووکە چۊ جۊجک جیکانم

لۆلانم شەو گرتەم شان سوو نامە قوڕ

کۆلانم رووژ ئەو بۊ پێشت شەو ئشکانم

خوڵ بۊم و بۊمە گوڵ گوڵ دامە گیسەێلت

گڵ بۊم و بۊمە دڵ دڵ دامەت باوانم

قۊتەم بیە دەێ ئاوە، سەوزە! سورەێ قورئان

هێزم بیە ژەێ خاکە، سەوزە! تیکەێ نانم

دڵ بێ خەم سەر بێ خەو گیان بێ تەم لەش بێ تەو

هەرچگ شەڕ هەرچگ شەو ژەێ خاکە تاڕانم

نف نەن ڵەم نف نەن ڵەم م لیموو شیرازی

قەپ دەن ڵەم قەپ دەن ڵەم م سێف لبنانم

سەوزەێ سەوزەێ سەوزەێ عەمرم عەمرم عەمرم

سەوزەێ سەوزەێ سەوزەێ گیانم گیانم گیانم