📙مشتێگ لە لیسک خوەر/ هەڵبەسوان: کاوە خوسرەوی

📙مشتێگ لە لیسک خوەر

📙هەڵبەسوان: کاوە خوسرەوی

 

شێعرەگاند وەر لە دەرمان ڕەسین هاوڕێ

ئەڕا ئایەمەیل پا لە لێوار فەوتان

ئاییەمەیل وڵات بێکەسێگ

ک مردن زیایە یگ لە کوڵ نانە وسل

بێ خەوەر کەفتنەسەوڕێ

وەرەو قەورسان زنێیەگان.

هنای تو چڕیدن

نە، نە، نەچین

بێ ئیوە منیش مرم

کەمێ پەشیمانەو بینە

لە هەڵکەنین گووڕ خوەیان.

 

ڕووژێگ تو کەفتیدەو ڕێ

“بانان” دەلیلد بی

وەرەو میلکان پف لە کوانێ کریایگ

وەرەو دیدار ئاخرین داڵکەیل دیرووکزانێگ

ک نەیشتن داڵەهوو

لە ناو بێدەنگی خوەیا بخنکێد

بێستۊن ڕاز ئەوین

لە سەر سینەی خوەی خەت بێیەید

مانشت لە بێکەسییا دەق بکەید.

 

هاوڕێ

ئەگەر ڕێبەنانە و ڕێ بەنە

ئەگەر سەفەر نادیارییە و خەیو بۊنە،

شێعرەگاند وە قاسدا کل بکە

تا بلاونەیل ئاشق

ڕێ دڵتەنگییەیلمان گوم نەکەن

“گوورانی” بڕەسێدە هانای ڕووح بەشکریایمان

وشەیەیل ناو کتاوەگاند

مناڵەیلمان لە لاڵی ڕزگار بکەن.

 

زۊکە هاوڕێ، دەرمان چارە نییە

دەردەزوان چارەسەرێ هەر زوانە

چارە، شێعرەیل ئازاد ناو نا هەناس داڵکەیلمانە

هەر وشەیگ نەفەرێگ نجات دەید

هەر کتاوێگ شارێگ

هەر کتاوخانەیگ وڵاتێگ.

  

بجمیە هاوڕێ، دی دێر دێرە

دۊا دەرفەتە و وەخت بیەسە گووڕهەڵکەن

مانمان کفن خوەی قەیچیبڕ کردێیە

نەیاران لە دەیشت قڕان

چەوەڕێ سەفبەسانمانن،

کەمێ ئەولاتر

سەرکەفتن لە سەر یاڵ بەرزێگ

پڕ مشتەیلێ لە لیسک خوەرە و

چەوەڕێ بڕیارمانە.