هەڵبەسێگ لە کاوە خوسرەوی

ئەگەر هاتی وەگەرد ڕەنگ بەو

لە ناو پایز مینەت کردم
لە بەین گەڵایەیلێک جوور یاد تو
دانە .. دانە لە دار هۊرمان کەفنەو خوار.
تو هێمای لە ناو باخ وەهار وسایدە
وە شەویک لە جنس نۊر
بێخەوەر لەوەی، لەوپەڕ دنیا
من لە ناوین خاک و واران
شوون عەتریادت لە وا پرسم.

من، تو وە ڕەنگەو ناسم
ڕەنگ دەنگت لە سەرچەوەی واران چوود
باڵات لە بەرزەچناران.
لە وەهار گوڵێک ئەڕام بار
تا دوارە گیان بگرم
میوەێک لە تاوسان
تا شیرینی خەنینت تام بکەم.
وەڵنگێ لە پایز بار
تا دڵتەنگیەییلم بوونە ڕەنگ تەڵا
تیکەیک لە یەخ زمسان بار
تا لەسەر داخ دۊری دابنەم.

من هێمای لە سەرەتای فەسڵم
وە چەوەیلێک پڕ لە یاد
دڵێک مەس لە تاسەی دیدار.
یادت دارێکە ڕیشەدار ، لق و گەڵای ماڵ ڕەنگە.
چوارفەسڵ، تو لە ناو گلارەم
ڕەنگڕێژ ڕەنگەیل ژیانی.

هەڵبەسوان:کاوە خوسرەوی